Аудандық тамыз кеңесі

   Ағымдағы жылғы 27 тамызда аудандық мәдениет үйінің базасында педагог қызметкерлердің дәстүрлі «Білімді ел – мәңгілік ел» тақырыбында тамыз кеңесі өтті. Білім беру ұйымдарынан 380-нен астам педагог қатысты. Өткен оқу жылына қорытынды жасалды, жаңа оқу жылының басты міндеттер талқыланған алқалы жиынға Аудан әкімі С.И. Саламацкий, облыстық білім беру басқармасының өкілі Е.Н. Дауенов қатысты. Алғашқы болып сөз алған, аудан әкімі Сергей Иванович көпшілікті жаңа оқу жылымен құттықтап, бұл отырыстың алдағы жұмыстарды айқындап, жоспарларды нақтылаудағы маңызын атап өтті.

   Успен ауданының білім беру бөлімінің басшысы Роза Қабиболлақызы өз баяндамасында мектепке дейінгі тәрбие, орта білім беру, білім сапасын арттыру, кәсіптік білім беру, кадр тапшылығы, тәрбие жұмыстары бойынша проблемалық мәселелер бойынша сөз қозғады. Тамыз кеңесі - дәстүрге айналған кезекті мәжіліс қана емес. Бұл білім саласындағы білгенімізді бөлісуге, түйгенімізді түгендеуге керекті жиын, деректі бас қосу, - деді ол.    Салтанатты рәсімнен кейін білім беру саласын дамытуға үлес қосқан педагогтар мен білікті басшылар ҚР ғылым және білім министрінің, облыстық, аудандық деңгейдегі мадақтамалар мен алғыс хаттармен, бағалы сыйлықтармен марапатталды.

   Ұстаздар кеңесіне арнайы Павлодар қаласынан М.М. Қатаев атындағы оқушылар сарайынан келген, тәрбиеленушілер әсем әнмен, мың бұралған бимен жиынның көркін қыздырды.